經過1個鐘左右車程, 我地又返嚟神戶啦!! 到咗呢個放血
目的地---"三井OUTLET PARK 神戶垂水"
(掛住買嘢,冇影門口相, 網上借圖)
安排嚟呢道嘅目的, 當然係去買 "agnes.b" 啦!! 上年嚟嘅時候
冇乜款揀, 不過要還吓Sir媽心願,所以再嚟多一次!!
好彩喎,今次唔只Sir媽有收獲,連Sir爸都有!! 一人一個背包,
再行前Ｄ,連阿Sir都有, 一家三口一人一個包!! 哈哈!!
行多一陣,終於又發現好嘢啦, 呢個近排熱爆超好味嘅牛乳
軟雪糕 "CREMIA"
呢個軟雪糕又係用北海道牛乳 (25%生牛乳) 乳脂含量達12.5%
(肥死人!!) 真係超好味!!我地當然二話不說一人一枝啦 (去咗血
拼嘅冇份食!! 哈哈!)
話時話,除咗雪糕好味之外, 個雪糕筒仲非常好味添!!
放血完畢, 又係時間晚餐啦! 今晚去咗間有得食又有得玩
嘅迴轉壽司 "無添 くら寿司" (又冇影門口,網上借圖)
點樣叫做有得食有得玩呢?? 因為呢間連鎖壽司店可以自已
點菜, 由另外一條快速輸送帶(火車型)送到你檯前之外, 仲可
以將你每次食完壽司嘅碟, 自已放入檯邊嘅回收口計數, 每次
放五隻碟, 座位上嘅點菜屏幕會有個小遊戲玩(不過唔可以自
已控制) 贏咗的話, 上方有個扭蛋機會送一個扭蛋比你架!!
呢個玩意非常之好,可以令到Ｄ小朋友好關心我地Ｄ大人!!
點解??? 因為佢哋會不停咁問你地 : 夠唔夠飽呀? 想食乜嘢呀?
我幫你再點Ｄ嘢食吖........
其實點睇都知佢哋係想要多Ｄ碟玩扭蛋啫......哈哈哈!!
可憐嘅我地!! 食到真係肚都爆呀!!
不過爆肚還爆肚, 返到酒店點都要食Ｄ宵夜甜品先瞓嘛!!係咪!
本日完!!
沒有留言:
張貼留言