九州の旅自駕遊----第三日

朝早起身,落酒店樓下食早餐!!

講起呢間酒店(唔記得影房間嘅相添!!)比個酒店官方照頂住先洒店相,可以講係全
個旅程最抵住嘅一間!! 8440円一晚包一家三口嘅早餐,樓上有戶內及戶外嘅温泉,
泊車唔收錢,地點幾好(別府兩大百貨公司係正左近)房間夠大仲要有海景!!
講返今日行程,今日係呀恩豬嘅重點行程之一..........harmony land呀!!之前睇人地D
遊記都講呢個樂園平日好小人,真係唔去你唔知,好似去咗"鬼城"呀!!!!!

由入場開始,一路行到玩機動遊戲嘅地方,不出十個人(包括公作人員)!!睇吓上面
嘅相你就知.......嘿嘿嘿!!!!
恩豬想玩乜都得,不過落住毛毛雨有D遊戲冇開(都唔知係咪冇人所以唔開)

到咗有Show睇嘅時候,又走咗多D人嚟睇!!

其實呢個樂園比小朋友嚟玩,一定好玩過東京嗰個好多!!
中午時候,有D公仔人出嚟同大家影相,不過恩豬都係唔敢自己一個人影(佢係狄狄
尼都係咁,佢好鐘意睡公主,但係同真人扮嗰個睡公主影相時,佢喊住話好驚要走,
都唔知係扮嗰個樣衰吖,定係睇慣咗DVD突然走個真人出嚟唔多慣!!)

其實仲有巡遊睇,唔知係咪落雨所以冇得睇!!(都好嘅!!如果唔係分分鐘做巡遊嘅
人仲多過睇嘅人......哈哈哈)
之後入咗餐聽食D嘢,又係所有樂園嘅指定動作: 又貴 加 好睇唔好食!!

食完嘢行去禮品店買吓嘢,呢個褔袋都買得過嘅,不過之前睇過人地D遊記個樣唔
同咗,可能耐唔耐要換吓啦!!

最後入去Kitty間屋,行吓影吓相就走囉!!

呢個喺間屋嘅大門口!!

返別府嘅時候,見仲有時間,走咗去全個旅程最揾笨嘅地方......別府八地獄!!!
去之前上網攞咗張割引卷嚟買飛,不過老婆大人話不如淨係睇最大嗰個海
地獄就算啦!!個個都差唔多啫!!我諗一場嚟到點都去睇吓影吓相啦,於是都
係買咗套票全部睇晒!!

呢嗰饅頭,個人感覺...............唔好食呀!!

呢張相好多人呢!!全部韓國旅行團嚟架!!我老婆同阿女之前坐喺中間位置,呢團
人一嚟到,二話不說,坐吓一個,坐吓又一個,將佢地兩個逼咗去一邊!!韓國人呀
行完頭兩個地獄,開始覺得老婆真係有見地.........都冇嘢睇嘅!!(可能我唔識欣賞啦)
所以話呢: 聽老婆話會發達係啱嘅(如果老婆睇到呢段嘢,肯定錫晒我啦)
行到差唔多五點,人地要關門啦,張套票有效兩日,明天請早啦!!
返酒店途中,入咗間小型超市,老婆話今日好攰,不如買嘢返酒店食算啦!!買咗D魚生
壽司,小食及杯麵返酒店開餐!!!

都未返到酒店,呀恩豬己經同周公個仔玩緊啦!!仲要訓到第二朝先起身,飯都冇食!!
老婆大人食完嘢,沖個涼己經同阿女一齊訓咗,自己一個人喺房上吓網.......到咗八
點幾,忍唔住一個人落樓下行吓,食D嘢!!之後返酒店浸温泉,早D訓啦!!!